Vergeet van rosige of pienk wange – die nuutste kleur blosser is geel! Deesdae sien ons al hoe meer hoe skoonheidsliefhebbers en -bloggers op Instagram met treffende heldergeel wange spog. Geel grimering is min van ons se eerste keuse, maar dit lyk baie mooier as wat ’n mens sou dink!
Geel grimeerskakerings is prettig en pas byna alle gelaatskleure, sê Raine Tauber, senior grimeerkunstenaar by die skoonheidshuis M.A.C. “Almal se vel het ’n natuurlike geel ondertoon, daarom sal ’n warmer geel jou gelaat komplementeer en verhelder.”
Om die voorkoms te kry skakeer grimeerkunstenaars dikwels ’n geel oogskadu verder uit na die slape en wange. “Ons sien die tegniek al hoe meer in die grimeerwêreld,” sê Raine.
’n Heldergeel skakering op die wange is dalk nie vir almal nie. Gelukkig is daar ook subtieler maniere waarop jy met dié vrolike kleur op jou gesig kan rondspeel.
Oogskadu
Sonsondergang-kleure op jou oë is sedert die begin van die jaar ’n groot gier. Kies ’n heldergeel of oranje en skakeer dit sommer met die vinger oor jou boonste ooglid totdat dit uitgewas lyk. Wees egter versigtig vir geel met lemmetjiegroen ondertone, waarsku Raine.
Oogomlyner
Jy kan geel oogskadu ook onder jou oë aanwend vir ’n onderstebo-grimeervoorkoms. Wend dan net ’n basislaag vir jou oë op jou boonste ooglid aan en rond dit af met ’n laag of twee maskara.
Verligter
Jy kan selfs ’n geel oogskaduskakering as verligter gebruik. Wend dit met ’n groot ronde kwas baie deursigtig op jou wangbene aan om jou gesig op te helder. Of tik ’n bietjie daarvan in die binnehoeke van jou oë aan om dit dadelik groter te laat lyk.
Probeer dié geel oogskadu’s:
M.A.C Eye Shadow in Nice Energy (R220)
NYX Hot Singles Eye Shadow in Stfu (R100)
Urban Decay Liquid Moondust Eyeshadow in Recharged (R320)
Lees nou
Gesonde hare belangriker as seks, verklap peiling
“Unicorn”-skoene wat van kleur verander!
The post Geel blos op jou wange! appeared first on SARIE.