Dis ’n ou staatmaker, maar die nuwe generasie gesigmaskers raak net al hoe gewilder danksy nuwe aktiewe bestanddele en interessante tegnologie wat jou vel in ’n kits kan omtower. Dis dus geen verrassing nie dat gesigmaskers die afgelope jaar die velsorgproduk is wat die meeste gegoogle is in Amerika, Japan en Frankryk. Veral dié wat aknee en ’n olierige vel takel, soos houtskool- en kleimaskers.
Ons weet wat jy dink: Met ons dol lewens het min van ons die tyd (of geld) vir ’n ingewikkelde velsorgroetine, en ’n gesigmasker is beslis ’n ekstra … maar jy sal verbaas wees hoe groot verskil ’n goeie produk aan jou vel kan maak.
So hoekom ’n masker gebruik?
Maskers beleef ’n oplewing omdat ons in ’n era van kitsbevrediging leef, sê Sonette Donker, velsorgkenner en eienaar van die estetiese salon Skin ID in Johannesburg. “Met ’n velsorgproduk soos ’n serum, wat dieper in jou vel werk, sien jy eers ná ’n paar maande werklik ’n verskil, terwyl jou gelaat dadelik beter lyk nadat jy ’n masker aangewend het. Dit is omdat ’n masker op die veloppervlak werk waar dit bv. onmiddellik oortollige olie absorbeer, jou vel bevog of dit afskilfer sodat dit plomper en gladder lyk.”
Baie van die maskers vandag is ook multifunksioneel en behandel meer as een velprobleem op ’n slag. En as jy ’n masker gereeld, so drie keer per week, gebruik, kan dit bydra tot ’n algeheel gesonder vel, sê Sonette. “Boonop hoef jy nie vandag meer ’n masker vir 20 minute aan te hou nie. Skoonheidshuise besef mense het min tyd en met baie van die nuwe maskers hoef jy dit net vir twee tot vyf minute aan te hou.”
Hoe kies ek die regte masker?
Vir ’n probleemvel:
Soek ’n masker met klei, salisielsuur of houtskool. Klei absorbeer die oortollige olie wat kan lei tot ’n probleemvel, salisielsuur werk inflammasie teen en droog puisies uit en houtskool maak jou vel ordentlik skoon.
Soek die woorde “purifying”, “clearing”, “clay”, “detox” of “oil absorbing” op die verpakking.
Vir ’n droë vel:
Bestanddele soos hialuronsuur, galambotter en melksuur gee jou vel ekstra vog.
Kyk vir woorde soos “hydrating”, “moisturising” of “nourishing” op die verpakking.
Vir donker vlekke en ’n vaal vel:
Kies ’n masker wat ook jou vel afskilfer. Wanneer jy van dooie selle op die veloppervlak ontslae raak, lyk jou vel stralend en gladder en donker vlekke oor tyd ligter. ’n Bestanddeel soos vitamien C help ook om jou vel te verhelder.
Soek die woorde “brightening”, “even complexion” of “even skin tone/colour” op die verpakking.
Probeer dié nuwe gesigmaskers:
Vir ’n probleemvel
Vir ’n probleemvel
Vir ’n droë vel
Vir ’n droë vel
Vir donker vlekke en ’n vaal vel
Vir donker vlekke en ’n vaal vel
Lees nou
Nuwe mode: Dra ’n strik in jou hare!
The post Die velsorg-“ekstra” wat jy in jou skoonheidskas móét hê! appeared first on SARIE.